O CONCELLO SACA A LICITACIÓN A OBRA DE RENOVACIÓN INTEGRAL DA RÚA BENXAMÍN PAZ

O proxecto, cun orzamento de 160.000 euros, contempla a renovación e ampliación de beirarrúas, a repavimentación da estrada, a sinalización horizontal e vertical, a renovación da rede de alumeado e a colocación de especies arbóreas

O Concello mantén aberto o proceso de licitación do proxecto de renovación de beirarrúas, repavimentación e sinalización da Rúa Benxamín Paz cun orzamento base de 160.044 euros.

Dito proxecto centrarase na demolición das beirarrúas existentes, ao non cumprir estas coa anchura mínima fixada pola normativa de accesibilidade, para proceder á execución dunhas novas con pavimento de baldosa e un ancho mínimo de 2 metros en ambos marxes da rúa.

“Ademais, o ancho das beirarrúas incrementarase ata os 4 metros en varios tramos da vía co obxectivo de facelas máis accesibles”, explicou o concelleiro de Infraestruturas Urbanas, Luis Fernández.

Pola súa banda, tamén se prevé a renovación completa da rede de alumeado que incluirá novas arquetas, báculos e luminarias. Concretamente instalaranse novos modelos con tecnoloxía led que melloren a eficiencia e o aforro enerxético.

No referido ao pavimento da calzada, estenderase unha nova capa de rodaxe de aglomerado en quente. “Os pasos de peóns existentes pasarán a ser sobreelevados para facilitar o tránsito peonil nunha zona na que é notablemente elevado e pola que pasan diariamente persoas maiores ou con mobilidade reducida debido á proximidade do centro de saúde”, engadiu a alcaldesa, Marta Rouco.

A renovación integral da rúa tamén implicará a súa urbanización mediante a colocación de especies arbóreas que permitan mellorar a estética da contorna. Ditas árbores colocaranse en alcorques nos tramos das beirarrúas que conten cun ancho de 4 metros, de tal forma que non afecten á normativa de accesibilidade.

Finalmente, as obras incluirán a colocación de sinais verticais e o pintado de marcas viais; fundamentalmente pasos de peóns, liñas de delimitación dos carrís de circulación e as zonas de aparcamento.

“Esta actuación constitúe xunto ás obras proxectadas para a renovación de beirarrúas, repavimentación e sinalización do tramo bidireccional da Rúa Guitiriz, unha aposta do goberno local polo reacondicionamento desta zona do casco urbano que se atopa nun notable estado de deterioro”, concluíu a rexedora, Marta Rouco.