O goberno local leva meses traballando en estreita colaboración coa empresa executora das obras e a dirección da mesma para estudar as actuacións precisas
O Concello executará a garantía das obras de humanización e remodelación da Rúa da Pravia para acometer as reparacións necesarias que permitan solucionar as deficiencias detectadas na mesma.
Tal e como explicou o goberno local no pleno ordinario celebrado a pasada semana “levamos meses en contacto e traballando en estreita colaboración coa empresa executora das obras e os arquitectos responsables da dirección da mesma para estudar as actuacións que sexan necesarias”.
Así, dende a dirección da obra estase a desenvolver un informe no que se estudan e recollen as causas das deficiencias nas actuacións e as reparacións que serán necesarias para solucionalas.
En consecuencia, o goberno local ten previsto que “as reparacións pertinentes se leven a cabo durante o mes de maio”, posto que “no presente mes de abril a nosa vila ten un nivel moi alto de actividade coa celebración da Festa do queixo San Simón da Costa, a feira de oportunidades e o Festival Independente de Vilalba”.
Así pois, “preténdese que os traballos de reparación causen as menores molestias posibles aos veciños e veciñas, así como ao discorrer dos eventos e aos visitantes que pasarán pola nosa vila nestas datas”, explicou a alcaldesa, Marta Rouco.
No referido ás reparacións, actuarase sobre as beirarrúas, as zonas de pedra da estrada que presentan deficiencias, os pasos de peóns e “calquera outra deficiencia que se detecte e sobre a que corresponda actuar”, aseguran dende o goberno local.
Finalmente, a rexedora, Marta Rouco, explicou que “as reparacións non terán ningún custo para as arcas municipais porque entran dentro da garantía da obra e actuouse en tempo e forma para que a empresa executora se faga responsable”.
Concello de Vilalba
Plaza da Constitucion 1
27800 Vilalba – Lugo
Oficinas Xerais tlf. 982 510 305
