O equipo móbil da Deputación de Lugo actuou sobre os 600 metros de lonxitude da capa de rodaxe da estrada para deixala completamente acondicionada
O Concello vén de informar da finalización dos traballos de rexeneración levados a cabo polos dous equipos do parque móbil da Deputación de Lugo sobre a estrada que une o barrio do Maciñeiro co de Viladónega, na parroquia de Corvelle.
En concreto, trátase dunha pista dunha lonxitude aproximada de 600 metros na que foi necesaria a rexeneración completa da capa de rodaxe. Así pois, para proceder á súa rexeneración foi precisa a aplicación de dúas capas de rego asfáltico e tres tipos de áridos de diferentes grosores, acentuándose as actuacións nas zonas máis deterioradas.
Ademais, co obxectivo de asegurar o mantemento futuro dos traballos levados a cabo, o equipo de terra do parque móbil da Deputación de Lugo desprazouse previamente ata Corvelle para limpar e abrir as cunetas da pista e así obter un resultado final óptimo de cara á chegada das choivas.
Nesa liña, a alcaldesa, Marta Rouco, salientou «a gran extensión da rede viaria do noso concello, que dificulta o acondicionamento total de todas as pitas do municipio», polo que, tal e como afirmou Rouco «estanse priorizando os viais en peor estado, co obxectivo de actuar no maior número de parroquias posibles para intentar que as melloras cheguen a todos os veciños e veciñas».
Concello de Vilalba
Plaza da Constitucion 1
27800 Vilalba – Lugo
Oficinas Xerais tlf. 982 510 305
